Dependentzia dutenei etxean bertan atenditzen ikasteko trebakuntza ikastaroa

Lan merkatura sartzeko laguntza behar dutenentzat eta egoera zailenean dauden herritarrentzat Udal Gizarte-ongizate sailak hainbat programa eta baliabide ditu, gizarte eta lan eremuan esku-hartze zerbitzuaren barne daudenak.

Helburu horiekin bat, dependentzia duten pertsonei etxean atenditzen ikasteko trebakuntza ematen ari da Izarra Zentroan. Trebakuntza eta enplegu bilaketa aktiboa sustatzeko helburuaz, herriko hamazazpi emakume ari dira ikastaro eta programa honen barne parte zuzena hartzen. Guztiak gizarte nahiz lan merkatuan txertatu ahal izateko ibilbideak jorratuz. Trebakuntza ikastaroak 67 ordu ditu, irailaren 29an hasi eta azaroaren 28an bukatuko dena.

Ikastaroaren jomugak ondorengoak dira:

• Etxean zaintza egiteko kontutan hartu behar diren aspektu nagusien inguruko informazioa eta trebakuntza ematea.
• Dependentzia egoera duten pertsonak zaintzean eman daitezkeen egoera ezberdinei aurre egiteko beharrezkoak diren estrategiez jabetzea.
• Etxean eman daitezkeen zaintza teknika eta abileziatan ikasleak entrenatzea.

Ikastaroko edukia sei modulutan banatu dira, horietako bakoitzean aspektu teoriko eta jarduera praktikoak uztartzen direlarik. Ondorengo atalak dira:

1. Zaintza lanak familian eta dependentzia egoeratan.
2. Oinarrizko zaintzak etxebizitzan bertan: higiene eta osasunaren ataleko beharrak.
3. Giza eta komunikazio gaitasunak, dependentzia duten pertsonak zaintzerakoan.
4. Portaera-desorekak eta etxean eman daitezkeen egoera zailak maneiatzea.
5. Zaintzailearen zereginak etxebizitzan.
6. Enplegua bilatzen jarraitzeko motibazioa.

Trebakuntza erizaintza, soziologia eta medizina eremuetan eskarmentu handia duten profesionalen gain dago.