'Eguen zuri' egunak hasiera emango dio 2016ko Inauteriari

Inauteriak atean ditugu. Bete-betean sartuko gara jaietan. ‘Eguen Zuri’k hasiera emango dio lau eguneko jai eta dibertsioari. Kultura Alorrak kaleratu berri du aurtengo Inauterietako egitaraua. Horren barne musikak protagonismo garrantzitsua izango du txarangak, orkestrak eta Djak, besteak beste, izango baititugu. Programari ‘Eguen Zuri’ egunean emango diogu hasiera. Arratsalde horretan, tradiziori jarraiki, oilarraren jokoa jokatuko dute herriko plazan eta gazteenek, eta diskoteka ere izango dute, DJ Xaiborren eskutik.

Ostiralean, Euskal Birusa taldeko kideek ‘Hartza Eguna’ ospatuko dute, kalejira eginez eta Txindurrik idatzitako kopla zaharrak kantatuz. Elkarteak deia egin die parte hartu nahi duten guztiei mozorroturik ager daitezen. Sare sozialean duen orrian honakoa dio. “Kalejira mozorrotuta egingo dogu, atara armairutik alkondara koloretsuena, lastozko txapela eta aurpegia margotu edo tapatu. Otsailak 5, ostirala arratsaldeko 6etan Ermuko plazan. Anima zaitez mozorrotuta Hartzari ongi etorria ematera! Zabaldu zure lagunen artean!

Larunbatean, ‘Irulitxa’ txarangak bi emanaldi egingo ditu, lehena eguerdian kalejira eginez eta bigarrena arratsaldez zazpietatik aurrera bigarren kalejira eskainiz kaleak girotzeko. Aurretik, umeek txokolate jana izango du, sabela bapo bete ondoren, gustura dantzatu ahal izateko. Dantzaldia TTR taldeak egingo du. Zazpietan Irulitxa fanfarriak protagonismoa berreskuratuko du bigarren kalejiran ateratzeko. Zazpi eta erdietan haurren mozorro lehiaketa egingo da. Egunari amaiera emateko, gauean, dantzaldia izango da herriko plazan, ‘Nueva Generación’ izeneko orkestrarekin.

Asteartean, arratsaldeko 4etan, haurrentzako diskoteka hasiko da eta, seietan, ‘Asmakizun asmatzaileak’ tituluko kale ikuskizuna ikusi ahal izango dugu. Egunari amaiera emango zaio, gaueko emanaldiarekin, musika Ohian Vega DJak.

Jarraian egitaraua uzten dizuegu PDF formatuko artxiboan, kontsultatu ahal izateko. Egitarauak bi orrialde ditu, aurrenekoak edizioko kartel irabazlea dago eta bigarrenean ekitaldi, ordu eta lekuen xehetasuna.

2016ko Inauterietan Ermuan izango dugun egitaraua