Galtzada mozketa AP-8 errepidean gaur goizaldean

Bizkaian AP-8a kudeatzen duen Interbiak sozietate publikoak jakinarazi du gaur gauetik goizaldera errepidea moztuko dela autobidean. Ermuko saihesbidearen obrak aurrera doaz, eta horixe da etenaldiaren arrazoia. Izan ere, lanetara datorren garraio berezi baten ondorioz itxiko da bidea Bilborako noranzkoan.

Galtzada 00:00etatik 06:00etara bitartean egongo da itxita, Ermutik (75 kilometro puntua) Durangora (88 kilometro puntua) doan autobide zatian. Gainera, Gerediagako (Abadiño) sarbidea ere itxita egongo da tarte horretan.

Trafikoa N-634 errepidetik desbideratuko da, eta Interbiakek desbideratzeak adierazteko seinaleak jarriko ditu.

Bizkaiko Aldundiak aldaketa horrek sor ditzakeen eragozpenak barkatzeko eskatu du.