Okin Zuriko espaloia egiteko lanak, azken txanpan

Bost asteko indusketa eta eraikuntza fruituak ematen hasi dira jada Ermuko Okin Zuri auzoan. Gune horretako aparkalekua eta Abelleira txatartegi zaharraren aurreko bidea lotuko dituen espaloia eraikitzeko obrak amaitzear daude.

Ezponda egonkortzeko indusketa lanak egin eta saneamendua biltzeko hodia lurpean kokatu ostean, espaloiaren plataformari eutsiko dion oinarria eta zintarriak eraiki dituzte langileek. Pixkanaka, dagozkion baldosak kokatuz, lana errematatzen ari dira orain. Espaloia amaitzea, argiak jartzea eta urbanizatzea baino ez da falta. Gainera, Okin Zuri auzoko pista balioanitzaren eta aurreko espaloiaren artean altuera izango duen zebra bide bat egingo da, bi aldeetara segurtasunez gurutzatu ahal izateko, bihurgunetik urrun.

Aurreikusita bezala doaz lanak aurrera, beraz, egun gutxi barru amaituko da obra. Bitartean, BI-2301 errepideko errei batek itxita jarraitzen du, eta txandakako pasoa semaforoekin erregulatuta dago. Hori dela eta, bideak erabiltzaile ugari dituela jakinda –bai oinezkoak, bai ibilgailuak–, Udaltzaingoak inguru horretan arreta areagotzeko eskatu du.

Proiektua hainbat erakunderen arteko elkarlanari eta kolaborazioari esker ari da gauzatzen: Uraren Euskal Agentzia –URA-, Bizkaiko Foru Aldundia eta Ermuko Udala koordinaturik ari dira lanean.

Jarraian duzuen argazki galerian lanek egun duten itxura ikus dezakezue.