Zuhaitz Eguna, aurten birritan

Bigarren astez jarraian, Zuhaitz Eguna ospatuko da igande honetan Ermuan. Artarrai Mendi Taldeak ekimen honen bigarren deialdia egin du, pasatu den igandean hasitako lana behar bezala amaitzeko.

VI. Zuhaitz Eguna martxoaren 6an, igandea, izan zen. Eguraldi txarra zela eta, ordea, ezin izan ziren aurreikusitako ale guztiak landatu. Dena dela, euriteei aurre eginez, hogeita hamar pertsona igo ziren mendira, aterkiak eskuan, eta 50 bat intxaurrondo eta haritz landatu zituzten.

Asteburu honetarako eguraldiaren iragarpena ona denez, Artarrai Mendi Taldeak ekintza errepikatzea erabaki du, eta landatu gabe gelditu ziren zuhaitzak landatzeko deialdia egin du. Patxi plazan izango da hitzordua, 10:00etan, eta handik Joxioko kanpara igoko dira, Sallabente gainera. Bertan, 200 bat pagondo, urrondo, lizar, erramu, haritz eta gurbitz landatuko dira.

Ekimen honen helburua herritar guztiak biodibertsitatea babesteaz eta basoek duten garrantziaz kontzientziatzea da. 2011n lehen aldiz Zuhaitz Eguna ospatu zenetik, hogei espezie desberdinetako 1000 landare baino gehiago landatu dira.

Informazio gehiago lortu edo pasatu den asteburuko argazkiak ikusi nahi izanez gero, Artarrai Mendi Taldearen blogera jo dezakezue.