‘Arratsaldean kontu kontari’ saio berezia Liburuaren Egunean

Larunbat honetan, apirilak 23, Liburuaren Nazioarteko Eguna ospatzen da, eta Ermuko udal liburutegiak ipuinak eta ilustrazioa batzen dituen ipuin saio berezi bat antolatu du. Liburuaren Eguna ospatu eta literatura eta irudigintzaz batera gozatzeko aukera paregabea izango da.

"Irudipuinketan: irudiak eta ipuinak” da saio berezi honen izena, eta 4 eta 9 urte bitarteko neska-mutilei zuzenduta dago. Yolanda Arrieta idazle eta kontalaria eta Aitziber Alonso ilustratzailea izango dira saioaren protagonistak eta zuzendariak.

Ekimena arratsaldeko 17:30ean hasiko da, eta sarrera guztiz doakoa izango da. Etenik ez eragiteko, parte hartzaileei puntualtasunez bertaratzeko eskatzen zaie.