Zerukoa A-09 eremuan eraikitzeko asmoa duen enpresak bilera informatiboa deitu du

Zerukoa A-09 eremuan –asteroko merkatu txikiaren ondoan- 18 etxebizitza eta garajeak eraikitzeko asmoa duen enpresa sustatzaileak, ‘Leziaga 1995 Construcciones, S.M.ak’ bilera informatiboa deitu du bihar arratsalderako. Bilera hori nahi duen orori zabalik dago eta Lobiano Kultur Gunean egingo da, arratsaldeko 7etatik aurrera.

Proiektuaren inguruan eta, batez ere, etorkizuneko ondasun horien salmenta ofizialki hirigintza izapidea baino lehenago hasi izanak herrian sortu duen kezka eta nahasmenduari erantzun nahi dio enpresa sustatzaileak. Horretarako bilera antolatu eta deitu du, azalpen zuzenak eta datuak emateko xedez.

Eguneko gai-zerrendak ondokoak hartzen ditu barne:

• Erretserba gisa orain arte hainbat pertsonek emandako diru kopuruen egoera.
• Zerukoa A-09 eremuan gauzatuko den hirigintza kudeaketari buruz informazioa ematea, aurreikusitako epeak eta planeamendua exekutatu eta kudeatzeko tresna ezberdinen arabera.
• Eraikitze-lanak hasteko eta hori exekutatzeko epearen inguruan dagoen aurreikuspena.
• 18 etxebizitza eta aparkaleku pribatuak eraikitzeko proiektuari buruzko informazio orokorra.
• Interesdunek izan dezaketen edozein zalantza edo galdera.