Azoka txikia jada San Pelaion dugu kokatuta

Kalez kaleko saltokien merkatua, ostiraleroko azoka edo merkatu txikia ohi deritzoguna, gaurtik aurrera San Pelaio parkean kokatuta izango da. Asteroko merkatua aspaldidanik Zubiaurre kaleko amaieran edo goiko aldean -50tik 52 zenbaki artean- eta BI-2301 errepidearen albo batean egin ohi zena lekuz aldatu da, denbora luzerako. Aldaketaren arrazoia Leziaga 1995 Construcciones enpresak A-09 Zerukoa gunean etxebizitzak eraikitzeko hasiko dituen obrak dira. Gaurko abuztuaren 3.n honetan eta opor garaian, San Pelaio pasrkean hamabost bat postu jarri dira.

Hirigintza garapena eta obrek izango zuten eraginaren aurrean, alternatiba ezberdinak izan ditu mahai gainean Udalak. Esaterako, Orbe Kardinala plaza toki egokia izan zitekeela pentsatu zen duen kokapenagatik, baina bertan izaten diren ekimen eta ospakizun ezberdinak eta karpa eraikitzeko egingo diren lanak direla eta, bertan behera utzi zen aukera hori. Koexistentzia kaleak eta elizaren ingurua ere aztertu ziren azoka txikia jartzeko, baina postuak oso sakabanatuta geldituko liratekeela, eta saltzaileen kamioiak aparkatzeko arazo larriak eratuko lituzketenaren ustez kokapena deuseztatu egin zen.

Horrela, bada, San Pelaioko parkea izan da azoka txikia kokatzeko hautatutako lekua, etxebizitzen obrak amaitu bitartean. Izan ere, postuak ordenatzeko toki hobea dauka San Pelaiok, eta azoka amaitu ostean gunea garbitzeko ere errazagoa izango da. Gainera, espazio segurua da, irisgarria, komun publiko bat dago bertan eta inguruko dendari eta tabernarientzat ere mesedegarria izango da.

Egun kaleko saltzaile ibiltarien Erroldan 21 titularrek dute Ermuko azoka txikian postua jartzeko baimena, baina normalean astero 18 inguru gerturatzen dira. Saltzaileak pozik agertu dira proposatu zaien leku-aldaketarekin.

Proiektua iragan maiatzaren 15ean aurkeztu zen Gai Orokorren eta Udalbatzak aztertu beharrekoen Informazio Batzordean.