Kaltxangoko zonaldean hilabete eta erdiko desbideratzea ezarriko da

Kaltxangoko irteera zaharra plaza eta berdegunean moldatzeko proiektua egiten ari den enpresak hilabete eta erdiko desbideratzea ezarriko du datorren astetik aurrera. Construcciones Morgak baimena eskatu dio Hirigintza alorrari hirigune barrutik Probaleku eta M. Valdespina kalearen bidez BI-3344 errepidera irteten den trafikoa desbideratzeko, Foto, Ocon, bertan dagoen kirol denda eta Valdespina kaleko 9. portalearen aurretik. Aldi-baterako desbideratzea izango da, hilabete eta erdi gutxi gorabehera iraungo duena, datorren astetik hasi (martxoaren 4-5ean) eta apirilaren 12ra bitartean luzatuko dena. Ibilgailuek jarraitu beharreko noranzkoa behetik gorakoa izango da –zerbitzuan izan eta erabiltzen genueneko kontrakoa-, gora iristean derrigorrez eskumara eta Kaltxangoko biribilgune berrira hartu beharko dugularik.

Desbideratzea erabili beharraren arrazoia lanak planifikazioaren arabera betetzen joatea eta orain dagoen irteera eta biribilgunearen arteko zatia baita ere lan egin ahal izatea dira. Horrela egin ezik, bidea behin eta berriz moztu egin beharko lukete langileek, irteera hori erabiltzen duten gidarientzat afekzio askoz handiagoa eraginez. Proposatu, probatu eta udal bulego teknikoarekin adostu den irtenbidea obra bukatzean ‘larrialdietarako pasabidea´ izango den eremua (eskaintzen dugun planoan gorriz pintatuta dagoena) da, kontrako noranzkoan. Desbideratzeari esker, obrak egiten ari diren gunea hesiez babestu eta gauzatu ahal izango dira, trafikoari eragin eta kaltetu gabe.

Obrako zuzendaritzak desbideratzeko hautatu duten bidearen baliagarritasuna probatu egin du ostalaritzako hornitzaile eta banatzaileek erabiltzen duten kamioiek arazorik izango ez dutela ziurtatzeko eta Bi-3344 errepidera ondo eta kontrako erreia inbaditu gabe ateratzerik dutela ziurtatzeko. Mankomunitatean hiri hondakin solidoak jasotzeko erabiltzen dituen kamio handiagoak ere ondo ibili ahal izango dutela probatu da. Desbideratzea behar bezala adieraziko da seinaleen bidez eta hori ezagutarazi guztiok jakinaren gainean egon gaitezen.