Tren geltoki azpiko pasabidea zabalik eta desbideratze gomendatua, Bizkaia Etorbidea urbanizatzeko

Ermuan geltoki berria egin eta trenbidea bikoizteko lanak azken txanpan sartu dira, proiektu osoa laster bukatzear baitago. ETSk kontrataturiko enpresek desbideratzea ezarri dute Bizkaia Etorbidean –zubi-bide azpiko zonaldean- erremate nahiz urbanizazio lanak egiteko. Trenbide azpiko pasabide berria bart arratsetik zabalik dago, Gipuzkoa Etorbideko eta Valdespina parkea lotuz, berdintasunaren pasealekutik. Hain zuzen ere, hori da enpresek proposatzen duten pasabidea, ‘Jator’ kirol zentroko autobus geltokitik aurrera moztuta izango baitute esaloia eta ingurukoak obra hasi aurreko egoerara bueltatu eta urbanizatzeko. Langileak atzotik jardunean dira, zonalde horretan erremateak egin eta proiektuari bukaera emateko xedez.

ABEEren aurrekuspenari jarraiki (Aldi-baterako Enpresa Elkartearen) desbideratzeak bi aste iraungo ditu, bart arratsetik maiatzaren 10eko ostiraleraino. Obra zuzendaritzak planoa erantsi du, non lan-gunea eta proposaturiko desbideratzea koloreekin markatu dituen. Enpresek herritarron laguntza eskatzen digute, lanak segurtasunez eta lehenbailehen egin ahal izateko.