Santa Anako Plan Berezia behin-betiko onartu du Udalbatzak

Ermuko Udalbatzak behin betiko onartu du Santa Ana auzoko hiri-berrikuntzarako Plan Berezia. Apirilaren 16an hasierako onespena eman ondoren, alegaziorik jaso ez denez, Plana behin betiko onartu da urriaren 15ean, asteartean, Osoko Bilkuraren ezohiko saioaren barruan. Udaleko alderdi politiko guztien aldeko botoa jaso du proposamenak, Alderdi Popularraren abstentzioa salbu.

Plan Bereziaren helburu nagusia udalerriko auzo garaienei irisgarritasun hobea ematea da, bereziki Santa Ana, San Roke edo San Isidro auzoei, igogailu publikoak nahiz pribatuak jarriz. Planak bide publikoa okupatzea arautzen eta ahalbidetzen du, eraikinetan barne-irisgarritasuneko arazoei konponbidea jartzeko, eta gainera, bi igogailu publiko jartzeko ikerketa eta analisia egiten du, auzo horietatik zehar anbulatoriora doazen eskailera mekanikoek dituzten gabeziak gainditzeko.

Juan Carlos Abascal alkateak Osoko Bilkuraren bilkuran azaldu bezala, proiektua "auzoko bizilagunen ekimenetik sortu da; izan ere, bizilagunak udaletxera hurbildu dira beren etxebizitzetan igogailuak jarri ahal izateko irtenbide bila. Horretarako, beharrezkoa da lurzoru publikoa lagatzea, eta plan honek horretarako aukera emango digu". Hala, 34 atarik igogailuak jartzeko aukera izango dute euren etxebizitzetan: 350 etxebizitzari eta 750 pertsona ingururi onurak ekarriko dizkio Planak.

Bestalde, auzoak udalerriaren erdigunera hurbildu ahal izateko bi igogailu publiko eraikitzea aurreikusten da, baita anbulatorioko eta Santa Ana auzorako bererako sarbidea hobetzeko ere. Udalak aurrekontu-zuzkidura izango du datorren ekitaldian aipatutako bi igogailuak jartzeko. Horietako bat Goienkalen kokatuko da, farmaziaren ondoan, eta bestea San Roken, San Pelaio Ikastetxearen lokalen alboan.