Baskulako geltokiko kioskoa eraitsi dute

Gune horretan Zearkale eta Lomi Powerreko urbanizazio berria lotuko dituen lur-azpiko pasabidea eraikiko da

Lomi Powerreko etxebizitzen promozioa eraikitzeko lanek aurrera jarraitzen dute, eta horri lotuta, azken egunetan Zearkalen, baskulako autobus geltokiaren ondoan kokatuta zegoen prentsa kioskoa bota dute. Gainera, kiosko zaharraren ondoko tailer mekanikoa ere hesituta eta eraisteko prest dago.

Behin bi azpiegitura horiek kenduta, gune horretan Areitiora igoeran eraikitzen ari diren Lomi Powerreko urbanizazio berria eta Zearkale lotuko dituen lur-azpiko pasabidea eratuko da.

Promociones Loiola higiezinen agentziak bultzatu du 57 etxebizitza libre eraikitzeko proiektua, trasteleku eta garajeekin. Horrez gain, beste 27 etxebizitza tasatu eta 18 babes ofizialeko eraikiko dituzte, guztiak hiru dorretan banatuta. Era berean, 100 garaje-plaza inguru izango ditu bizileku berriak, txandakakoak eta udal-jabetzakoak. Joan den abuztuan bota zuten Lomi Power fabrika zaharra, eta lanek erritmo onean egin dute aurrera.

Altuna y Uria enpresa eraikitzailea Promosa sozietate publikoarekin akordio batera iritsi zen lurzorua erosi eta sustapen hori garatzeko.