Hasi dira Errotabarriko parkea estaltzeko lanak

Errotabarri plazako haurren jolasek estalkia izango dute laster, euria egiten duen egunetan ere bertan jolastu eta gozatu ahal izateko. Jada hasi dira oihalezko karpa instalatzeko prestakuntza lanak, eta obra urtarril honetan bertan amaituko dela aurreikusten da. Momentuz, parkea hesituta eta itxita dago, eta ezingo da erabili karpa kokatu arte.

Arquitectura Textil S.L. esleipendun enpresak zapatak egiteko lanak hasi ditu parkearen inguruan. Plazaren azpian aparkalekuak daudenez, horren gaineko zoruan zapata aurrefabrikatuak jarriko dira, zoladura zulatu edo aldatu gabe, forjatuari eta garaje-plazen iragazgaizteari ez eragiteko. Elementu horiek jarri ondoren, 260 metro koadroko oihalezko karpa aurrefabrikatua ekarri eta haurrentzako jolas gunearen gainean muntatuko dute. San Pelaio plazan lehendik dagoenaren antzekoa izango da azpiegitura.

Obraren aurrekontu osoa 130.953,46 eurokoa da, BEZa barne.