Imanol Arias Ermura itzuliko da 'El coronel no tiene quien le escriba' antzezlanarekin

Ermua Antzokiak gure herriak izan duen bizilagun ezagunenetako bat hartuko du ostiral honetan, otsailaren 7an. Imanol Arias aktoreak lehen aldiz bisitatuko du herriko eszenatokia, El coronel no tiene quien le escriba antzezlana taularatzeko.

Koronel zaharra eta bere emaztea miseria gorrian bizi dira, gobernuaren gutun baten zain. Gerrako zerbitzuengatik agindutako pentsioa emango diotela jakinarazi behar diote gutun horretan.

Halere, gutuna ez da iristen, eta bitartean, bikote zaharra ozta-ozta bizi da, pobrezia latzean. Gainera, borroka-oilar bat elikatu behar dute, bizirik irauteko duten itxaropen bakarra baita. Denborak aurrera egiten du, eta gutuna heltzen ez denez, erabaki bat hartu beharko dute: oilarra elikatzea edo beraiek biak elikatzea. Herritarren diruzalekeria, ustezko lagunen lukurreria, halabeharra eta gerraren ergelkeria gehitzen zaizkio koronelaren bakardadeari. Bizitzak behea jota utzi du, baina bi altxor ditu oraindik koronelak: emaztearen maitasuna eta bere duintasuna.

Koronel zaharraren tragedia munduko bidegabekerien isla da. Patuak aurkezten dizkion zailtasunen aurrean duen erresistentzia gaitasuna mugagabea da; gainera, gizakiengan duen fedea eta itxaropena bezain indartsua den izaera errebeldeak gidatzen du bide horretan.

El coronel no tiene quien le escriba Gabriel Garcia Marquezek idatzitako izen bereko eleberrian oinarritzen da, eta Natalia Gruesok antzerkira moldatu eta Carlos Saurak zuzentzen du. Haurtzaroaren eta gaztaroaren zati handi bat Ermuan igaro ostean, berriro herrian izango dugu Imanol Arias, antzezlaneko protagonista. Ondoan izango ditu, eszenatoki gainean, Cristina de Inza, Jorge Basanta, Fran Calvo eta Marta Molina.

• Antzezlanaren dossierra 

80 minutuko iraupena du antzezlanak, eta 22:15ean hasiko da ostiral honetan Ermua Antzokian. Sarrerak salgai daude 15 euroren truke Lobiano Kultur Gunean, BBKren orotarako kutxazainetan, Kutxabanken webgunean eta, ikuskizuna hasi baino ordubete lehenagotik, Antzokiko leihatilan.