Uretamendiko tunelak itxita egongo dira gaur gauean, mantentze lanak direla eta

Uretamendiko tunelek 634 errepide nazionala, Ermuko saihesbidea eta AP8 autobiderako sarrera lotzen dituzte. Tunel horiek mantentzeaz arduratzen den enpresak jakinarazi du aldi baterako itxi egingo dituztela azpiegiturak, bi noranzkoetan, gaur osteguna, apirilak 23, 22:00etan hasi eta bihar ostirala, hilak 24, goizeko 06:00ak arte. Tarte horretan mantentze lanak egingo dira, eta gauza bera errepikatuko da datorren asteko asteazkenetik ostegunera bitarteko gauean, ordutegi berean.

Hori horrela, egun eta ordutegi horretan ordainsarira edota AP8 autobidera sarrerara iritsi ahal izateko, Eibarko eta Ermuko saihesbideak lotzen dituen biribilgunea hartu beharko da Bizkaia Etorbidetik edo Sallabentetik, edo bestela, Areitioko mendatetik Iurretaraino jarraitu.

Indarrean dagoen alarma-egoeran eta biztanleentzako konfinamendu orokor honetan, kontserbazio-lan horiek ez dute eragin handirik izango, salbu eta gaueko txandara lanera doazenentzat edo arratsaldeko txandatik itzultzen direnentzat, ordutegi-tarte horren lehen unean.