Kontuz: pilota partida jokoan

Ermuko Udalak ostegun honetan estreinatu du Erdikokale eta Orbe Kardinalaren plazaren arteko pasabidean ''kendu eta jartzeko'' olana. Elementu hori, herriko plazaren irudi historikoekin apaindua, tarte horretan jarriko da pilota edo pala txapelketa edo lehiaketetan, oinezkoei pasatzen ez uzteko eta, horrela, inork ezusteko pilotakadarik ez jasotzeko.

Erdikokale kaletik Orbe Kardinala plazarainoko pasabidea frontoiaren ondoko paretatik ireki ondoren, pilotak partida batean bertatik ihes egiteko eta inguruan dabiltzan pertsonek kolperen bat hartzeko arriskua sor daiteke. Horregatik jarriko da olana berria txapelketetan zehar, Erdikokaleko plazatxotik igarotzen diren pertsonei pasabidea itxi eta babestuz. Partida bakoitza amaitu ondoren, elementua kendu egiten da, mosketoien bidez pasabideari ainguratuta baitago.

Olanak bi argazki historiko ditu bi aldeetan inprimatuta, eta horiek plazara pasatzen garen gunetik ikus ditzakegun antzeko ikuspegiak erakusten dituzte. Alde batean, Partido de pelota en juego – Pilota partida jokoan testua ikus daiteke, pasatzea debekatzen duen seinale batekin batera.