Espetxeratua Ermuko merkataritza-establezimenduetan egindako lapurreten ustezko autorea

Ertzainek, Ermuko Udaltzaingoarekin lankidetzan, 19 urteko gazte bat atxilotu dute herriko sei merkataritza-establezimenduetan izandako lapurretak, egotzita. Gazteak polizia-aurrekari ugari ditu, eta sarrerako ateak edo babes-pertsianak behartuta sartzen zen lokaletara dirua batez ere lapurtuz. Atzoko ostiralean, Agintari Judizialaren esku jarri zuten, eta honek Basauriko espetxera eramateko agindua eman zuen.

Joan den astelehenean, Ertzaintzak jakin zuen dirudienez goizaldean hiru lapurreta egin zituztela indarra erabiliz Ermuko hiru merkataritza-establezimendutan, bi harategitan eta ileapaindegi batean. Lokaletako sarrerako ateek behartu izanaren zantzuak zituzten eta, aurkeztutako salaketen arabera, diru guztia lapurtu zuten. Hortik abiatuta, Eibarko Ertzain-etxetik, Ermuko Udaltzaingoarekin lankidetzan, zegokion ikerketa hasi zuten lapurreta horiek argitzeko. Horrela, arratsalde horretan bertan Eibarren aurkitu zuten gazte bat identifikatu zuten, eta zegozkion frogaketak egin ondoren, eginbideak ireki zizkioten ikertu gisa lapurreta horiengatik.

Biharamunean, asteartean, antzeko beste hiru lapurreta egin zituzten Ermuan, horietako bi aipatutako harategietan eta hirugarrena sektore bereko beste establezimendu batean. Lapurreta horien ikerketek ondorioztatu zuten lapurreta horien egilea aurreko lapurretengatik identifikatu eta ikertu zuten pertsona bera izan zela. Ostegun arratsaldean Eibarren atzeman eta atxilotu zuten.

Atxiloturiko gaztea beste 16 aldiz atxilotu izan dute, eta ostiral goizean jarri zuten Durangoko Epaitegiaren esku jarri eta epaileak espetxera eramateko agindua eman zuen.

Adingabe bat ikertuko dute beste denda batean lapurreta egiteagatik

Joan den ostegunean, goizaldeko lauak aldera, Ermuko Udaltzaingoak Ertzaintzari jakitera eman zion kolpe handiak entzuten zirela San Pelayo kaleko merkataritza-establezimendu batean eta pertsona batek ihes egin zuela. Herritarrak babesteko lanetan ari ziren patruilak bertaratu ziren, eta egiaztatu zuten dendako erakusleihoaren kristala hautsita zegoela. Agenteek inguruan aurkitu zuten estolda-estalki bat, ustez kristala hausteko erabili zutena barrura sartu eta lapurreta egiteko. Inguruak miatu zituztenean, Ertzaintzako agenteek gazte bat ikusi zuten kalean, eta haiek ikustean, korrika ihes egin zuen. Atzetik segi ondoren, agenteek geldiarazi egin zuten. Gaztea, adingabea, bat zetorren dendan indarra erabiliz lapurreta egiten saiatu zen pertsonaren deskribapen fisikoarekin. Arrazoi horrengatik, identifikatu eta zegokion polizia-atestatua izapidatu zuten ikertu gisa egitate horiengatik.