Jolasaren Nazioarteko Eguna ospatuko dugu lehen aldiz Ermuan

Larunbat honetan hainbat jardueraz gozatu ahal izango dugu Haurren Kontseiluaren eta Ermua, Hiri Adeitsua Adinekoekin proiektuko talde eragilearen lanari esker

Jolastea pertsona guztien eskubidea da, haien adina edozein dela ere. Ondo dakite hori Haurren Kontseiluaren bosgarren edizioa osatu duten 32 haurrek eta Ermua, Hiri Adeitsua Adinekoekin talde eragileko 15 pertsonek. Ikasturte honetan zehar egindako hausnarketari eta elkarlanari esker, maiatzaren 28an, larunbata, Jolasaren Nazioarteko Egunaren lehen edizioa ospatuko dugu Ermuan.

Orbe Kardinalaren plazan izango da jaia 17:00etatik 20:00etara, herritar guztientzako jarduerekin; jolastea guztion kontua delako. Hainbat gunetan banatuta, joko erraldoiak, egurrezkoak, kiroletakoak, betikoak eta mahai-jokoak izango ditugu guztion gozamenerako.

Hainbat elkarte eta talderekin batera antolatutako guneak ere izango ditugu: Ermua-Mallabia Oinarrizko Lanbide Heziketako Udal Institutuko Ile-apainketako eta Estetikako ikasleei esker aurpegiak eta azazkalak margotzeko postua muntatuko da; Ermuko Merkataritza eta Ostalaritza Elkarteak utzitako kartoizko kaxekin, jolas libreko gunea; eta Saskibaloi Eskolaren eskutik 3x3ko txapelketa eta tiro libreen erakustaldia. Ekintza guztiak musikaz eta Kiri pailazoaren ikuskizunaz girotuta egongo dira.

• Jolasaren Nazioarteko Eguneko kartela eta programa

Haurren V. Kontseiluaren erronka

San Lorenzo, Ongarai, Anaitasuna, Eskolabarri eta San Pelaio ikastetxeetako Lehen Hezkuntzako 2. eta 3. mailako 32 haurrek parte hartu dute bosgarren Haurren Kontseiluan, eta pasatu den ostiralean aurkeztu dizkiote alkateari aurten jorratu duten erronkaren emaitzak: gure herrian Jolasaren Eguna antolatzea.

Ermuko Alkatetzaren organo aholkulari gazteenak Ermua, Hiri Adeitsua Adinekoekin proiektuko talde bultzatzailearen laguntza izan du erronka horri aurre egiteko. Lan-saioetan, tokiko Tazebaez enpresako dinamizatzaileen laguntza ere izan dute.

Larunbat honetan, Jolasaren Nazioarteko Egunean, Kontseiluaren eta adineko pertsonen taldearen proposamenei esker sortu diren hainbat jarduerez gozatuko dugu.