Agortu dira Minbiziaren aurkako X. Martxarako 3.100 dortsalak

Ermuko Minbiziaren Aurkako Elkarteak gaixotasunaren aurkako martxaren edizio berria antolatu du urriaren 27rako, igandea. Hamargarren edizioa arrakastatsua izatea espero da beste behin; izan ere, bi asteren faltan, salgai jarritako 3.100 dortsalak agortu dira jada.

Kamisetak eta zenbakiak 10 euroren truke saldu dira azken asteetan, eta bildutako dirua Malu Martínez-Chantar CIC bioGUNEko ikertzailea buru duen "Medikuntza pertsonalizatua haurren gibeleko minbizirako" ikerketa-proiektura bideratuko da.

Martxari dagokionez, urriaren 27an 11:00etan abiatuko da lasterketa Orbe Kardinala plazatik, eta 3,4 kilometroko ibilbidea izango du, korrikan, oinez, bakarrik nahiz lagun artean egiteko. Bi ordu ingururen buruan, parte-hartzaile guztiak herriko plazan bilduko dira berriro, eta Malu Martínez-Chantar doktoreari txekea emango zaio kioskoan.

Hamargarren edizio honetan, aurrekoetan bezala, gaixotasunaren ikerketari ikusgarritasuna eta laguntza eman nahi zaio guztion partaidetzarekin. Ermuko Minbiziaren Aurkako Elkarteak herriaren inplikazioa aitortu nahi du eta eskerrak eman nahi dizkie erakundeei eta herritarrei, oro har, emandako babes guztiagatik.

X. urteurreneko ekitaldia

Urteroko martxaz gain, ekimenaren hamargarren urteurrena ospatzeko, Minbiziaren Aurkako Elkarteak ekitaldia antolatu du datorren urriaren 26rako, larunbata, Ermua Antzokian. 16:15etik 18:30era bitartean, mahai-inguruak eta Pispillu Abesbatzaren, Debabarrena Orfeoiaren eta Trío Medianoche taldearen musika emanaldiak izango dira gozagarri. Sarrera doakoa izango da edukiera bete arte. Animatu zaitez!