Asteburuan ‘Rental family 'eta‘ Hamnet' filmak proiektatuko ditu Antzokiak

Ermua Antzokiak beste lau estreinaldi proiektatuko ditu aste honetan. Datorren osteguneko zineklubaren saioak hasiera emango dio programazioari, eta bertan, 'Nouvelle Vague' zinta frantziarra jatorrizko bertsioan (JBA) ikusteko aukera izango dugu, gaztelaniazko azpitituluekin, 20:30etik aurrera. Richard Linklaterrek zuzendutako drama honek 105 minutu irauten du. Filmak publikoaren saria jaso du Moreliako jaialdian. 'Nouvelle Vague' izenez ezaguna den mugimendu zinematografiko frantziarraren sorreraren atzean dagoen istorioa jasotzen du, Jean-Luc Godarden 1959ko 'À bout de souffle' film berritzailearen ekoizpena du ardatz.

Zinema komertzialaren atalean, larunbatean, hilak 7, eta astelehenean, hilak 9, 19:30ean eta 20:30ean, hurrenez hurren, ‘Rental family' ikusi ahal izango dugu, Hikarik zuzendutako ekoizpen japoniarra. Brendan Fraser aktorea protagonista duen 103 minutuko komedia dramatikoa da. Aktore estatubatuarra bizitzan helburu bat aurkitzeko borrokan ari da, ezohiko lan bat lortzen duen arte: "alokairuko familien" agentzia japoniar batentzat lan eginez, ezezagunentzako ordezko papera eginda.

Asteko bigarren proposamen komertziala ‘Hamnet' film luzea da, Chloé Zhaok zuzendutako ekoizpen britainiarra. William Shakespeareren emazte Agnesen istorioa kontatzen duen drama biografikoa da, bere seme bakarraren, Hamneten, galera gainditzeko borrokan. Filmak Oscar sarietarako zortzi izendapen ditu, horien artean pelikula onenarena, zuzendaritza onenarena eta emakumezko aktore protagonista onenarena. 125 minutu irauten du. Larunbatean 22:00etan eta igandean 19:30ean ikusi ahal izango dugu, hurrenez hurren.

Azkenik, publiko gazteenarentzako proposamenean, igandeko 17:00etan, 'Los guardianes del diente mágico' animazio estatubatuarra eskainiko dugu. Michael Johnsonek zuzentzen du eta 88 minutu irauten du. Van, espiritu errebeldea duen hortz maitagarri gazte bat, bere zibilizazio hertsi eta isolatuaren mugetatik haratago zer dagoen deskubritzea amesten du. Bere mundua betiko aldatzen da Rupee ezagutzen duenean, munduko trolik maitagarriena, eta Gemma, zientziarekiko grina duen goblin burutsua.