'Black is Beltza II: Ainhoa' udako eta kaleko saioaren filma

Ermuko aire zabaleko udako zine programazioa azken txanpan sartu da. Proiekzioen azken astea izango da eta bi emanaldi izango ditugu, gaur gauekoa eta asteazkenekoa. Gaur, astelehena, Fermin Muguruzak zuzendutako 'Black is Beltza II: Ainhoa' animaziozko filma ikusi ahal izango dugu gaueko hamarretan C. Orbe plazan. Espainia eta Argentinako koprodukzioa da, 86 minutu irauten duena. 2022an estreinatu zen eta Goya sarietan animaziozko film onenaren sarirako izendatuta egon zen. Musika Maite Arroitajauregi eibartarrarena da.

Sinopsia

Ainhoa mirariz jaio zen La Pazen (Bolivian) Amanda ama atentatu parapolizial batean eraila izan ondoren. Kuban hazi eta 1988an, 21 urterekin, iniziazio-bidaia bati ekiten dio Euskal Herrira abiatuz lehenbiziz, Manex aitaren lurraldea ezagutzera. Gatazka errepresibo betean, Josune kazetari konprometitua eta bere lagun koadrila ezagutuko ditu. Josuneren mutilaguna heroina gaindosi baten ondorioz hiltzen denean, honek erabakiko du Ainhoarekin batera bidaia jarraitzea eta honela murgiltzen dira Libano, Afganistan eta Marseilla hiritik barrena. Gerra Hotzaren azken urteak dira, eta biak narkotrafiko-sareen mundu ilunean murgilduko dira, bai eta sare politikoekin dituzten lotura estuetan ere.

Asteazkenean, hilak 30, 'El cuarto pasajero' izeneko film luzeak amanera emango dio 2023ko udako edizioari.