Gazteguneak ateak zabalduko ditu larunbat honetan, aisialdirako proposamen berriekin

Ermuko Gazteguneak, 13 eta 17 urte bitarteko nerabeei zuzenduta, larunbat honetan, urriaren 3an, 17:00etan ekingo dio berriro jarduerari. Espazioak aisialdirako programazio berritua dakar, eta beste urte batez gazteentzako topagune izatea du helburu, aisialdiaz gozatzeko, harremantzeko eta hainbat jardueratan parte hartzeko, ingurune seguru eta kontrolatu batean.

Espazioak aisialdiaz gozatzeko hainbat aukera eskaintzen ditu, hala nola mahai-futbola, ping-ponga, diana, mahai-jokoak eta telebista adimenduna. Horrez gain, denboraldi honetako berrikuntza nagusietako bat formatu txikiko jardueren eskaintza handiagoa izango da. Horietan parte hartzeko ez da aldez aurretik izena eman beharko, horrela, bat-bateko parte-hartzea erraztu eta Gaztegunera bertaratzen direnen interesetara egokitutako proposamen anitzak eskaini ahalko dira.

Topagune seguru bat

Liburutegiaren eraikineko hirugarren solairuan kokatuta, Gazteguneak 13 eta 17 urte bitarteko nerabeei beren aisialdiaz gozatzeko eta adin bereko beste pertsona batzuekin jarduerak partekatzeko espazio propioa eskaintzen die.

Une oro langile espezializatuak egongo dira Gaztegunean, jarduera zein instalazio guztietan. Honela, ingurune seguru bat eskaintzen zaie gazteei, parte-hartzea eta aisialdi zein bizikidetza segurua bermatzen duena.

Izena ematea eta ordutegiak

Gaztegunean parte hatzeko, aldez aurretik izena eman behar da. Izen-ematea gurasoek edo legezko tutoreek egin beharko dute eta  bi bide daude horretarako: udalaren egoitza elektronikoaren bidez edo aurrez aurre Abiapuntun nahiz Liburutegiaren eraikinean. Jada zabalik dago izen-emateko epea 2010 eta 2014 artean jaiotakoentzat.

Gaztegunea larunbatetan 17:00etatik 21:00etara eta igandeetan 17:00etatik 20:00etara egongo da zabalik.