Haurren kanpaldiak aurreikuspen guztiak gainditu ditu eta 24 ordu baino gutxiagoan agortu dira plaza guztiak

Ermuko Haurren Kontseiluak eta Udal honek maiatzaren 31rako antolatutako haurren kanpaldi handiak herritarren erantzun izugarria jaso du. Epea ireki eta ordu gutxitara plaza guztiak bete dira, eta, ondorioz, izena emateko epea aldez aurretik itxi behar izan da, hasiera batean apirilaren 28ra arte zabalik izatea aurreikusten zen arren.

Ermuko Udaletik eskerrak eman nahi dizkiegu familiei, gure haurren parte-hartze lanaren ondorioz sortu den proposamen honen inguruan erakutsitako ilusio eta interesagatik. Hainbat alor garrantzitsu azpimarratu nahi genituzke:

• Eskaera handia: Gure udalerrian tamaina eta ezaugarri hauetako kanpaldi handi bat antolatzen dugun lehen aldia da. Harrera oso ona izan da, 24 ordu baino gutxiagoan bete baitira eskainitako 100 plazak. Badakigu horrek espektatibak sor zitzakeela familia batzuetan, eta horregatik baloratzen ditugu inplikazioa eta gogo bizia.
• Jardueraren hedapena: Kanpaldiari buruzko informazio guztia — informazio-liburuxkak, izena emateko galdetegia eta xehetasun logistikoak barne — apirilaren 7an, astelehena, 11:45ean argitaratu zen udalaren webgunean eta sare sozialetan. Ordu horretan bertan, Haurren Kontseiluko haurrek beren ikastetxeetan aurkeztu zuten ekimena, eta mezu elektronikoak bidali zitzaizkien ikastetxeei, dagokien informazioarekin. Udalerriko ikastetxeetan ere kartelak jarri ziren.
• Onarpen-irizpideak: Izen-emateak eskaeren hurrenkera zorrotzaren arabera kudeatu dira, 2023/2024 eta 2024/2025 ikasturteetan Haurren Kontseilua osatzen duten umeentzat 20 plaza erreserbatuz, horiek izan baitira jardueraren bultzatzaile eta antolatzaileak. Plaza horietakoren bat hutsik geratuko balitz, izena eman dutenen zerrenda orokorrarekin osatuko litzateke.
• Aforoak eta segurtasuna: Gehienezko parte-hartzaile kopurua 100 da, eta adingabeen segurtasunarekiko eta ongizatearekiko konpromisoari erantzuten dio. Kanpaldia Miguel Ángel Blanco kiroldegiko kantxan egingo da. Bertan, jarduera ludikoak, atsedenlekuak eta espazio seguruak diseinatu dira, haurrek esperientziaz lasaitasun osoz goza dezaten. Muga hori UNICEFek haurrak babesteko politikaren barruan emandako gomendioei ere erantzuten die, Ermuak Haurren Hiri Lagun gisa parte hartzen baitu politika horretan.

Beste behin ere, biziki eskertzen dugu familien konfiantza eta babesa haurren parte-hartzetik jaiotzen diren proposamenei, balioetan hezteko, lotura komunitarioak sendotzeko eta, jakina, ondo pasatzeko helburuarekin.

Onartuen zerrenda

Kanpaldian parte hartzeko onartutako pertsonen zerrenda kontsulta daiteke jada Udal honen iragarki taula elektronikoan, baita erreserban geratzen diren haurren zerrenda ere, plazaren bat libre geratzen bada ere. Onarpenak inskripzio-hurrenkera zorrotzaren arabera egin dira.