Lomi Powerreko igogailua irailean jarriko da funtzionamenduan

Bizkaia Etorbideko 21. zenbakian, Lomi Power eremuan eta etxebizitzen sustapenean, jarri den igogailu berria irailean jarriko da funtzionamenduan. Jasogailu berriaren horniduraren eta horren instalazioaren esleipendun den Aszende, S. M. enpresak egunotan bukatzen ari da azpiegiturako azken lanak. Eusko Jaurlaritzako Industria Sailak bisita egingo du datozen egunetan, instalazioari eta, ziurrenik, hori martxan jartzeari oniritzia emateko. Sailak segurtasun-baranda bat kabinaren gainean jartzeko eskatu zuen, mantentze-lanei babes handiagoarekin ekin ahal izateko. Aste honetako astelehenean Aszendeko langileek eskatutako baranda metalikoa jarri zuten.

Igogailuak, jada, sare elektrikorako konexioa du. Kanpoko urbanizazio-obrak ere amaituta daude. Kanpoan eta kabinan bideozaintzako kamerak konektatzea falta da. Igogailu horrek oinezkoen irisgarritasuna bermatu eta hobetuko du, Zeharkale eta Bizkaia Etorbidea BI-3344 errepidearen azpitik lotzen dituen azpiko pasabidearen erabiltzaileontzat. Kale horiek eskaileren eta jasogailu berriaren bidez lotuta geratu dira, eta, horrela, ez da beharrezkoa izango aipatutako bidea galtzadatik zeharkatu behar izatea.

Udal Bulego Teknikoak koordinatzen ditu hornidura hori instalatzeko lanak, eta bertako teknikariek azpiegitura berria noiz ireki eta martxan jarriko den iragarriko dute, agendan sartu ondoren.