Merkatu Plazaren erabilerak definitzeko prozesu parte-hartzailearen saioak amaitu dira

Bart arratsean, Ermuko Udalak merkatuko plaza zaharraren erabilerak definitzeko prozesu parte-hartzailearen hirugarren eta azken saioa gauzatu zuen. Herritar guztiei irekitako saioa izan zen, eta herritarrek eraikinaren etorkizuneko erabilerari buruzko proposamenak eta hausnarketak egin ahal izan zituzten.

Hirugarren saio horretan herriko 40 kolektibok baino gehiagok eta norbanako ugarik parte hartu dute Ermuko etorkizunerako ekimen anitz, inklusibo eta aberasgarri batean.

Beatríz Gamiz alkateak positibotzat jo du prozesuaren garapena: "Herritarren eta gure kolektiboen parte-hartze aktiboa funtsezkoa izan da Ermuko beharrei benetan erantzungo dien proiektu bati forma emateko. Eskerrak eman nahi dizkiet Merkatu plazaren etorkizunerako hausnarketan denbora eman eta ahalegindu diren pertsona eta erakunde guztiei. Eraikuntza kolektiboaren adibide bikaina izan da".

Hurrengo urratsak

Proposamen guztiak jaso ondoren, Udalak planteatutako erabilerak aztertu eta bateratzeko lan egingo du, prozesuan adierazitako ahalik eta behar handienak bilduko dituen proiektu bat lortzeko. Ondoren, merkatuko plaza komunitatearen eskaeretara egokitutako espazio berritu bihurtuko duen proiektuaren kontratazioari ekingo dio.

Udalak herritarren parte-hartzearekin eta herriari eragiten dioten erabakiak gardentasunez hartzearekin duen konpromisoa berresten du, etorkizuneko Ermua guztion artean eraikitzea ahalbidetuko duten prozesu ireki eta kolaboratiboen aldeko apustua eginez.