Mugikortasun urriko pertsonek aparkatzeko txartelak behar bezala erabiltzen dituztela kontrolatzeko kanpaina

Ermuko Udaltzaingoa egunotan kanpaina berezi bat egiten ari da, mugikortasun urriko pertsonentzat erreserbatutako guneetan aparkatzeko diren txartelen erabilera zuzena dela eta iruzurrezko erabilerarik ez dela bermatzeko. Kontrol-kanpaina orain aste batzuk hasi zen; helburua kolektiboaren eskubideak errespetatzen direla bermatzea da, eta mugikortasun-arazoak dituzten pertsonentzat gordetako plazak soilik benetan behar dituztenek erabiltzen dituztela bermatzea.

Kanpainaren lehen hilabetean agenteek 9 txartel erretiratu dituzte hainbat irregulartasunengatik eta horien erabilera arautzen duen martxoaren 22ko 50/2016 Dekretua urratzeagatik. Erretiratutako txartelen kasuistika zabala da; kasu batzuetan, titular onuraduna zendu izan delako, eta, beste hainbatean, hirugarren pertsonek iruzurra egin eta txartel horiek behar ez bezala erabili dituztelako.

Ermuko alkate Beatriz Gámiz andreak adierazi duenez, "kanpaina honek mugikortasun murriztua duten pertsonekin hartutako konpromiso agertzen du, pertsona horien irisgarritasuna eta mugikortasuna bermatzeko, inolako oztoporik gabe. Txartel horiek behar ez bezala erabiltzea benetan behar dituzten pertsonekiko errespetu falta da".

Udalak gogorarazten du txartel horiek behar bezala erabiltzea ez dela erantzukizun-egintza, baizik legezko betekizuna. Horregatik, Udaltzaingoa ausazko kontrolak egiten ari da txartelen baliozkotasuna, titulartasuna eta iraungi gabe daudela egiaztatzeko. Araudia betetzen ez den kasuetan, agenteek zehapena jartzen dute.

Kontrol-kanpaina horren bidez, Ermuko Udalak inklusioaren eta aukera-berdintasunaren aldeko konpromisoa indartzen du, mugikortasun murriztua duten pertsonentzako baliabide publikoak modu zuzen eta egokian erabil daitezen zainduz.