Nerabeek eta adinekoek elkarrekin agurtu dute "Eman zure eskua" belaunaldien arteko proiektuaren bigarren edizioa

Lobiano Kultur Guneak Eman zure eskua udal proiektu estrategikoaren itxiera eta agur saioa hartu du. Ekimenaren bigarren edizioan Ermua-Mallabia Oinarrizko Lanbide Heziketako Institutuko Ile-apainketa eta Irudi Pertsonaleko ikasleek eta adineko pertsonek parte hartu dute. Guztiek bat egin dute proiektuaren itxiera saioan, Juan Carlos Abascal alkatearekin eta Jol Gisasola Hezkuntza zinegotziarekin batera.

Eman zure eskua Ermua, Hiri Lagunkoia Adinekoekin proiektu estrategikoaren barruko zeharkako ekimena da, eta institutuko ikasleen curriculum akademikoan sartuta dago. Ile-apainketa eta Irudi Pertsonaleko ikasle taldeak eta Udaleko Gizarte Zerbitzuek bultzatutako 70 urtetik gorako pertsonen laguntza psikoemozionaleko taldeak belaunaldien arteko topagune solidario bat izan dute astean behin. Zerbitzurako ikaskuntza-metodologiaren bidez, parte-hartzaileek esperientziak, ikasitako teknikak eta emozioak trukatu ahal izan dituzte, estereotipo eta aurreiritzi edadistarik eta generokorik gabe.

2022/2023 ikasturte honetan zehar proiektuaren bigarren edizioa garatu da. Lehen edizio arrakastatsuaren ondoren, jarduera egokitu behar izan da adinekoen parte-hartze eskaera handiari erantzun ahal izateko. Horrela, 10 pertsona baino gehiagoko hiru talde antolatu dira, eta bi saio egin dira talde bakoitzeko. Bilerak sei ostegunez jarraian egin dira Lobiano Kultur Gunean eta, noizean behin, Jubilatuen Etxean. Proiektuan parte hartzen duten bi kolektiboen arteko lotura-estrategia gisa, ikasleek institutuan ikasitako teknika estetikoak aplikatu dizkiete adineko pertsonei, eskuetako azazkalak zaintzeko eta edertzeko.

Eman zure eskua ekimenaren edizio honen amaiera eta agur gisa, martxoaren 30ean ekitaldi hunkigarria egin da Lobiano Kultur Gunean. Arduradun politikoen irekiera eta esker oneko hitzaldiaren ondoren, ikasleek eta haien tutore Silvia Gómezek egindako saioen laburpen-bideo bat ikusi dute parte-hartzaileek. Gainera, bai nerabeek bai adinekoek esker oneko gutunak irakurri dituzte euskaraz eta gaztelaniaz, eta diplomak eta opariak jaso dituzte oroimenerako eta errekonozimendurako.

Azpimarratu behar da berriz elkartzeko unea proiektuari amaiera bikaina eta pertsona guztientzat hunkigarria izan dela. Guztiek, baina bereziki adinekoek, horrelako ekimenen aldeko apustua egiten jarraitzea eskatu eta eskertu dute, balio psikoemozional erantsia ematen baitute, komunitatearen eta prebentzioaren ikuspegitik, maila guztietan.