Pintura Eskolak jarduerari ekingo dio irailaren 16tik aurrera

Ermuko Udal Pintura Eskolak ateak zabalduko ditu 2024/2025 ikasturterako. Zerbitzuak eskolak eskainiko ditu irailaren 16tik aurrera Lobiano Kultur Gunean, eta lehentasuna izango dute martxoan izena emanda zeuden 114 pertsonek.

Joan den ikasturteko ikasleek irailaren 2tik 12ra izango dute, biak barne, Ermuko Udaleko Kultura Sailari pintura klaseekin jarraitzeko interesa dutela jakinarazteko. Horrela, plaza erreserbatzeko orduan lehentasuna izango dute irailaren 16an hasiko diren jardueretan, eta aurretik eskatutako talde eta ordutegietan jarraituko dute.

Udal Kultura Saila posta elektroniko bidez jarriko da harremanetan ikasle ohiekin, eta jasoko duten postari erantzunez edo Lobiano Kultur Gunera bertaratuz, jarraitu nahi dutela adierazi ahal izango dute. Irailaren 12rako erantzunik jaso ez bada, ulertuko da pertsona ez dagoela interesatuta eta plaza libre geratuko da.

Bestalde, norbaitek taldez aldatu nahi badu, izena emateko orria berriro bete eta eskatutako plaza Kultura Sailak baieztatu arte itxaron beharko du. Baja eman nahi dutenek formalki izapidetu beharko dute Abiapunturen bitartez.

Irailaren 16ko astean irekiko da ikasle berriek izena emateko epea eta familiako arte tailerren deialdia. Pertsona horiek urrian hasiko lukete ikasturtea.

Eskolen hasieran, haurrek mantal bat eramatea gomendatzen da, pinturaz zikin ez daitezen. Helduen kasuan, ikasturtean zehar garatu nahi duten proiektua argi badute, adibide gisa behar duten koadroa, argazkia edo materiala ekar dezakete. Bestela, eskolak ereduak eskainiko ditu aukeratu ahal izateko.