Udalak euskara sustatzeko aurtengo dirulaguntza lerroak zabaldu berri ditu

Ermuko Udaleko Euskara sailak kudeatzen eta urteko aurrekontuan jasota dituen bi dirulaguntza lerroak zabaldu berri dira. Dirulaguntza lerroak ondorengoak dira:

• Elkarteentzako ohiko dirulaguntzak. Euskara sustatzeko proiektuak laguntzeko asmoa duen lerro hau irabazi asmorik gabeko elkarteei bideratuta dago eta eskabidea egoitza elektronikoaren bitartez bideratu ahalko da apirilaren 30era arte. Lerro honen oinarriak Lurraldeko Boletinean argitaratuta daude eta lasterbidez lotuta uzten dizkizuegu. Aurreko edizioetan dirulaguntza honen bitartez Euskal Birusak antolatutako Laburbira laburmetraia emanaldia, Ermuan Kantuan, Ermuan Egunean Behin, Berbetan eta Sortuko dira ekimenak diruz lagunduak izan ziren. Lerro honek 5.000 euroko laguntza du.
• Diruz laguntzen den bigarren lerroa, berriz, gure udalerriko hizkuntza paisaia euskalduntzera bideratuta dago, hortaz, herriko establezimenduetan dauden kanpoko errotulazioa, barne irudi korporatiboa zein web orria euskaraz jartzea diruz laguntzen du Udalak. Kasu honetan, eskabideak aurkezteko epea azaroaren 29ra arte zabalik egongo da eta eskabideak heldu ahala bideratuko dira dagokion partida agortu arte, hau da, 4.000 euro guztira. Lerro honen oinarriak Lurraldeko Boletinean argitaratuta daude eta lasterbidez lotuta uzten dizkizuegu.

Bi laguntza lerro hauek euskara biziberritzeko euskara planaren barruan kokatzen dira eta zentzu horretan, Euskara sailak gogoratu nahi du herriko establezimenduetan jendaurrean lan egiten duten pertsonek %100eko dirulaguntza lortuz euskara ikas dezaketela.

Informazio gehiagorako idatzi: euskara@udalermua.net postontzira.