Zaporeak elkartearen eskualdeko VIII. erronka gaur hasiko da

Zaporeak Gobernuz Kanpoko Erakundeak gaurko astelehenean ekingo dio Lesbosen (Grezian) errefuxiatuentzat Debabarrenan ahalik eta elikagai gehien biltzeko helburua duen 2026eko erronka solidarioari. Elkartearen leloa "behar duenarentzako eguneko otordu duina" da. Aurten Zaporeak Debabarrenan 25 tona genero lortu nahi ditu errefuxiatuei janaria zerbitzatu ahal izateko. Eskualdeko zortzi udalerrik hartzen dugu parte: Ermua, Eibar, Elgoibar, Mallabia, Soraluze, Deba, Mendaro eta Mutriku.

Parte hartzen duen udalerri bakoitzari jaso beharreko produktu bat esleitu zaio. Ermuan, Soraluzen eta Deban arroz luzea bilduko dugu; Eibarren, dilista pardina; Elgoibarren, garbantzu pedrosillanoa; eta Mallabian eta Mendaron, hodi-makarroia eta Mutrikun arrain-kontserba. Gure herriaren kasuan, arroz paketeak Eroski dendan, Beta elektrizitate dendan, Sagarra gastro-pubean, BM supermerkatuan eta AEK Kaltxangon entregatu ahal izango ditugu.

Laguntzeko moduak: tupper solidarioa eta zozketa-txartelak erostea, edo dirua ematea

Ahalik eta produktu gehien bildu ondoren, larunbatean, hilak 14an, Tupper Solidarioa ospatuko da Eibarko Errebal plazan, eguerdiko 12:30etatik 3etara bitartean. Ekitaldi honetan, 5 euroren truke, tupperra erosi ahal izango dugu Lumagorri oilaskodun arrozarekin eta fruta pieza bat ere. Zaporeak elkarteko sukaldari laguntzaileak arduratuko dira bazkaria prestatzeaz.

Beste aukera bat da bailarako establezimenduetan 10 afari bikoitz eta toki artisten pintura koadroak zozketatzeko 1 €-ko txartelak erostea da. Gainera, Debabarreneko Zaporeak taldeak kontu korrontea ireki du La Caixan, nahi duen herritar guztien ekarpen ekonomikoak jasotzeko. Kontu zenbakia ES53 21002724 8101 0066 3988 da.

Erronkan bildutako produktu guztiak Greziako Lesbos uhartera bidaltzen dira, eta han babesten dira gerratik ihesi doazen pertsonak. Zaporeak sukaldaritzan aritzen da, eta egunero banatzen ditu elikagai horiekin prestatutako 3.000 anoa. Horrez gain, astean 7.000 litro esne eta 2.500 kilo fruta ematen ditu, dohaintzen diruarekin bertatik bertara erosten direnak.