Euskara ikasten ari diren pertsonentzako beken aldaketari buruzko aurretiazko kontsulta publikoa

Euskara ikasteko dirulaguntzak emateko oinarri espezifikoak, gaur egun gure udalean indarrean daudenak, egokitu egin behar dira azken urteotan gizartean gertatu diren aldaketetara, egungo beharrizan berriei eta etorkizuneko ikuspegiari erantzuteko.

Hartan, hezkuntza sistemak eta helduen euskalduntzeak egindako ibilbidea lagungarria izan da euskaldun kopurua handitzeko. Euskara ulertu edota hitz egiteko baldintzak gero eta gehiago dira gaur egun, baina euskararen gaitasun erlatiboa ez da neurri berean hazi.

Euskaraz edozein testuingurutan eroso moldatzen diren hiztun ahaldunduak izatea da datorren hamarkadarako erronka, eta horretarako, ezinbestekoa izango da euskara irakatsi eta ikasteko aukerak zabaldu eta metodologia eta baliabide berriak proban jartzea.

Era berean kontuan hartu behar da hazkunde demografikoa gertatzen ari bada, atzerritik etorritako biztanleei esker gertatzen ari da, eta beraz, euskararen erronketako bat bada euskara hizkuntza gutxitua izanagatik ere, gizarte kohesiorako elementu bihurtzea; euskaratik urrun dauden emakume eta gizon horien beharrizanak aintzat hartuz, euskara ulertu edota hitz egiteko gaitasunean laguntzea.

Hala ere, herritarrek ez dute euskara ikasteko aukera bera euren baldintza ekonomiko, sozial edota pertsonalak tarteko, eta bada beste erronka bat euskara ikasteko aukera berriak sortu eta baldintzak erraztea. Ildo horretatik, baldintza sozial ezberdinetan dauden herritarren ikas aukerak aztertu eta proposamen berriak egitea dagokigu eta hori ere bada araudi honen proposamenaren helburua.