Ongarai ikastetxeak jantoki berria estreinatu du

Ongarai eskola eta Institutoko ikasleek jantoki berria dute. Ikastetxeak atzo inauguratu zuen ofizialki ikasleriarentzako jantoki berria. Instalazioa hasi berri den ikasturterako prestatu da eta 150 bazkideentzako edukiera du, txanda bakoitzeko. Une honetan jantokian 170 lagunek izena eman dute. Sukaldaritza lana eta begiraleak MCC taldeko ‘Auzo-Lagun’ enpresarekin hitzartu dira. Koordinazio lanari dagokionez, hori zentroko Marisa Tornos irakasleari egokitu zaio.

Ongarai ikastetxeak utzitako argazkia

Atzokoa estreinaldiko eguna izan zen eta Guraso Elkarteko kide eta beste ikastetxekide zenbait gonbidatu zituen bazkaltzera.

Jantokiaren ezaugarriak

Jantokia ikastetxeko behe solairuan ipini da, bertara kirol-pistaren ondoko atetik duelarik sarera. Iazko ikasturtera arte bertan bestelako gela eta zerbitzuak zeuden, denbora gutxi barru birmoldatutako ‘Gure Etxe’ eraikinean egongo direnak. Jantokiak sukaldea, sukalde-ondoa eta bazkaltzera doazenentzat bi gune berezitu ditu. Lehenengo guneak, mahai eta aulki txiki eta koloredunak ditu, gaztetxoenentzat. Bigarren guneak, mahai eta jarleku luzeak ditu eta horiek erabiltzaile nagusiagoentzat dira.