Miguel Ángel Blanco autobusa Ermura etorri da

Miguel Ángel Blanco Fundazioren autobusa Ermuan dugu gaur. Autobusak zinegotziaren erailketa eta horren inguruko gizarte mobilizazioak gogora ekartzen ditu. Autobusa Zubiaurre kalean jarri da, Erdikokaleren ondoan eta Probaleku plazaren aurrean. Autobus hori Madriletik abiatu zen ekainaren 14an eta gaur bere ibilbidea bukatuko du, estatuko hamar hirietatik pasa eta gero. Hiri horiek Valentzia, Murtzia, Málaga, Ávila, Zamora, León, Burgos, Logroño eta Gasteiz izan dira. Esan bezala, ekimenaren azken jomuga Ermua zen, eraildako zinegotziaren jaioterria, hura bahitu eta, 48 ordutara, tirokatu zutenaren hamargarren urtebetetzea betetzen den egunean.

Autobusa hausnarketarako eta zinegotzi gaztea gogora ekartzeko lekua da, bere izaera eta funtzio pedagogikoa izanik. Bertan orain hamar urte bizi izandako gertakizunei buruzko ikus-entzunezkoak ikus daitezke. Hainbat ermuar bertan izan dira gaur goizean, nahiz eguraldiak ez duen askorik lagundu, euria izan baita. Autobusaren kanpoaldean, Cristina Cuesta eta Virginia Arroyo zinegotzia egon dira, herritarren testigantzak eta mezuak jasotzen.