Rai Bueno ipuin kontalariaren saioa bihar

‘Kontu kontari’ ekimena hilabete berriarekin batera datorkigu. Bihar larunbata –abenduaren 1a- egingo da udal liburutegian. Saioa Rai Buenok egingo du. Ikuskizuna arratsaldeko bost eta erdietan hasiko da liburutegiaren barne, haurrentzat prestatu eta egokitutako aretoan. Saioa aproposa da 6 urtetik 11ra bitarteko gaztetxoentzat.

Iraupena ordu betekoa izango dela aurreikusi da. Antolatzaileek eragozpenik ez daitezen sortu, parte hartzaileei puntualtasuna eta isiltasuna eskatu diete.

Proposamen honen helburuak anitzak dira eta horien artean ondokoak aipa genitzake: haur liburutegia dinamizatzea ahozko tradizioari jarraiki; narratiba gazteenei helaraztea eta, larunbat arratsalderako aukera ezberdin eta bestelako batean bilakatzea. Ekimenaren bidez irakur zaletasuna suspertzeaz gainera, partaideen irudimen eta sormena ere landuko dira.