Haurtzaindegiak datorren ikasturterako matrikulazio aldia zabalduko du

Herriko haurtzaindegiak 2009-10 ikasturterako matrikulazio aldia irekiko du datorren astean. Izen-emateak maiatzaren 15era bitartean hartuko dira. Datozen bi asteetan zehar izen ematen duten umeek iraila edo urrian hasiko dira zentrora joaten. Haurtzaindegiak 41 plaza eskainiko ditu irailetik aurrera, horietatik 18 jaio berri eta urte batera artekoentzat izango dira eta gainerako 23 plazak urte batetik bira artean dutenentzat. Eskabidea 2008 eta 2009an jaiotakoen gurasoek edo legezko tutoreek aurkeztu dezakete. Eskabideak haurtzaindegian bertan hartu eta aurkeztu behar dira. Hori lanegunetan egin ahal da, goizeko hamarretatik hamaiketara bitartean.

Estreinakoz aurtengoan maiatzaren 16aren ondoren eta ekainaren 30a bitartean jaiotzen diren umeentzat ere eskabideak aurkezteko aukera izanen da. Ume horientzat izena eman ahal izango da baita ere, lehenengo kasuan ekainaren 16a bitartean eta bigarrenean uztailaren 1era arte. Ermuko haurtzaindegia ‘Haurreskolak’ partzuergoaren barne dago eta bere kudeaketa Eusko Jaurlaritzaren eta udal honen esku dago.

Haurtzaindegiaren ordutegia goizeko zazpi eta erdietatik arratsaldeko sei eta erdietara bitartean luzatzen da etenik gabe. Ermuko haurtzaindegiak 0 urtetik bira bitarteko jaioberri eta umetxoak hartzen ditu eta 90 umerentzako lekua du. Bertan zazpi gela, jantokia eta beste gela osagarriak daude. Haurreskolak hurrengo kuotak kobratuko ditu irailetik aurrera, partzuergoaren Batzar Nagusian onartutakoari jarraiki. Hortaz,indarrean izango diren zenbatekoak ondorengo hauek dira:

• Zerbitzua erabiltzen den orduen arabera, zenbatekoak:
• 5 ordu edo gutxiago: 151 euro.
• 5 ordu baino gehiago: 198 euro.
• Egokitze-aldia: 141 euro.

Haurreskolak patzuergoak matrikulazio aldiaren zehetasunak azaltzen dituen argitalpena kaleratzen du. Bertan jakin beharreko guztiak jasotzen dira, zentroen definizioa, tipologia, ordutegiak eta egutegia, kuotak, onarpen eta baremazio irizpideak edo jatorduen inguruan jakin beharrekoak. Argibide eta zehaztasun gehiagorako, interesdunek Iparragirre kaleko egoitzara joan edo 943 17 64 31 telefonora dei dezakete.