'Haurren Hiri Laguna' aitorpena berritu du Ermuak 2029ra arte

Ermuko Udalak bigarren lankidetza hitzarmena sinatu du gaur UNICEFekin, eta, horrekin, 2026-2029 aldirako ‘Haurren Hiri Laguna' aitorpena berritu du. Beatriz Gámiz Mata alkateak eta Jose Antonio Madariaga Ibarra UNICEF Euskadiko Batzordeko presidenteak dokumentua sinatu dute gaur goizean udaletxean egindako ekitaldian. Ermuak haur eta nerabeen eskubideak tokiko agendaren erdigunean kokatzeko borondatea berresten du, eskubideen eta ekitatearen ikuspegia duten politikak bultzatuz.

Beharrak betetzetik eskubideak gauzatzera

Udalerria gidatuko duen estrategiak "oinarrizko beharretan" soilik oinarritutako plangintza atzean uzten du, giza eskubideetan zentratzeko. Ikuspegi horretatik, udalak bere gain hartzen du eskubideak bermatzeko erantzukizuna, eta ziurtatzen du tokiko politikak ez direla esku-hartze isolatuak edo zatikatuak, epe luzerako eraldaketa integraleko prozesuak baizik.

II. HANUPen sei zutabe estrategikoak

Haurren eta Nerabeen II. Tokiko Plana (II. HANUP) helburu operatiboen gainean egituratuta dago, eskubideen ikuspegi hori Ermuan errealitate ukigarria izan dadin diseinatuta:

1. Gobernantza eta komunikazioa: haurrei zuzendutako politikak koordinatzeko egitura sendoak finkatzea.
2. Hezkuntza-prestakuntza: Udalerriko ikastetxeekin koordinazio estuan prestakuntza-ekintzak garatzea.
3. Kultura, kirola eta aisialdia: Kalitatezko jolaserako eta denbora librerako eskubidea bermatuko duten politika aktiboak bultzatzea.
4. Benetako parte-hartzea: haurrak eta nerabeak entzunak izan daitezen eta haiei eragiten dieten gaietan modu autonomoan parte har dezaten sustatzea.
5. Babes-mekanismoak: Adingabeen ongizatea eta segurtasuna bermatzeko berariazko udal-tresnak garatzea.
6. Hiri eredua: Haur begiekin diseinatutako hiri baterantz aurrera egitea, ingurune seguruak eta hiri mugikortasun inklusiboa lehenetsiz.

Aitorpena aldez aurretik egindako eta partekatutako landa-lan trinko baten emaitza da

Ermuko Udalak, Ermua Hiri Hezitzaileko lantaldearen bitartez, analisi eta hausnarketa prozesu bat bultzatu du azken urteotan, UNICEFen laguntza teknikoaz. Ahalegin horri esker, modu parte-hartzailean identifikatu ahal izan dira udalerrian haurrei eta nerabeei zuzenduta garatzen diren baliabideak, programak eta ekintzak.

Prozesu horren ondoren, diagnostiko sakon bat eta Haurren eta Nerabeen II. Tokiko Plana egin dira. Plan horrek jarraipena ematen dio aurrekoari, eta indartu egingo du haurren eta nerabeen eskubideak sustatzera eta defendatzera bideratutako udal-antolamenduaren egitura. Adierazle desberdinetatik abiatuta, kolektibo honek Ermuan duen errealitateari buruzko informazio kuantitatiboa eta kualitatiboa jaso da, eta horri esker, sortzen ari diren beharrak eta udal erakundeak datozen urteetan aurre egin nahi dien erronka nagusiak antzeman ahal izan dira.

Lege- eta udal-konpromisoa

Plana bat dator Euskadiko Haur eta Nerabeei buruzko 2/2024 Lege berriarekin, zeinak aurrekontu lehentasuna eta zeharkakotasuna ezartzen dituen jarduera printzipio gisa. Horrela, Ermuko Udalak konpromisoa hartzen du II HANUPri beharrezko baliabideak emateko, udal langile guztiek eskubide horiek betetzen direla bermatzen dutela ulertuta.