‘Armairurik gabeko’ liburutegi baten alde

Gay eta Lesbianoa izan eta harro izatearen eguna atzo ospatzen zenez, udal liburutegiak tematika hori jorratzen duten liburu eta materialak ikusgai jarriko ditu. Erakusketa jartzearekin batera irakurketa gida bat ere prestatu du, sexu aniztasunaren gaia jorratzen duten web gune, filma eta liburuak bilduz. Material horiek adin guztientzako aproposak dira eta elkarlanean prestatu dute Emakumearen Topaguneak eta udal liburutegiak.

Erakusketa nahiz gidaren xede nagusia materialak ezagutzera ematea eta horiek hautatzeko interesa duten pertsonak orientatzea da, sexu aniztasunaren inguruan udal liburutegiak dituen materialak agerian jarriz, erabiltzaileek informatu eta hezi daitezen, gure gizartetik homofobia baztertzeko.

Horrekin guztiarekin batera, Euskal Herriko Gay eta Lesbianen Elkarteko -Gehitu- www.gehitu.net zerbitzu eta sexu aniztasunari buruzko argitalpenak ere eskaintzen dira. Eta baita ere, Gay, Lesbianak eta transexualak atenditzeko www.aldarte.org ALDARTE eta honek sexu askatasunaren aldeko dokumentazio eta ikerketa zentroaren material eta txostenak.