‘Jules Verneren azken abentura’ dakar Antzokira Gorakada taldeak

‘Gorakada’ antzerki taldeak haurrentzako antzerki emanaldia aurkeztuko du bihar Ermuan. Taldeak ‘Jules Verneren azken abentura’ tituluko muntaia dakar. Ikuskizuna Antzokian izango da eta arratsaldeko bostetan hasiko. Ekimena udal kultura sailak antolatu du. Sarrerak 4 euro balio du. Antzezlan hau aproposa da 5 urtetik aurrerako haur eta gaztetxoentzat eta, baita ere familian datozen ikusleentzat. Emanaldia euskaraz egingo da eta gutxi gorabehera berrogeita hamar minutu iraungo du.

Obra Álex Díazek zuzentzen du. Gidoia Jokin Oregik egokitu du. Obran lan egiten dute ondorengo antzezleek: Josu Kamara, Ainhoa Alberdi, Izaskun Asua eta Zigor Bilbao.

Sinopsia

1906. urtea da eta Jules Verne bere azken lana idazten ari da. Bitartean Marta, etxeko neskamea, lanean aurrera eta atzera dabil. Hasiera batean Julesen irudimenari ihes egiten badio ere, apurka-apurka istorioan sartzen hasten da, buru belarri murgildu eta azken abenturaren protagonista bilakatu arte. Martaren laguntzarekin, gainera, Jules Vernek azken lana bukatzea lortuko du.