Urtian ur hornidura hiru orduz etengo da, kanalizazio handiagoa konektatzeko

Urtia industrialdeko hainbat eraikinek urik gabe egongo dira astelehen goizean –azaroaren 14an- hiru orduz, gutxi gorabehera. Zerbitzua esleiturik duen Agbar enpresak eta udaleko lan taldeak horrela iragarri dute. Biek aditzera eman dutenez Urtia industrialdeari zerbitzu ematen dion hodia sekzio handiagoa duen beste batekin birkonektatuko dute. Ur etena goizeko hamaiketatik arratsaldeko ordu 1era bitartean egingo da.

Lan hori egin ahal izateko ura hornidura eten egin behar dute eta, dagoen hodia moztu eta sekzio zabalagoa duen berriari birkonektatzeko. Hori horrela, industrialdeko hainbat eraikinetan ez dute urik izango lanak egiten diren denbora tarte horretan. Obrak eragingo dien zonaldea ondorengoa da: Areitio igoeran eta Lomipower enpresaren gainetik dauden eraikin guztiak: Monroe ohikoa, Amaya Telleriarena, Zearreko bueltakoa eta horren parean dauden eta Bizkaia Etorbidekoak diren eraikinak.