Zamalan-guneen diagnostikoa

Udaltzaingoa udalerrian dauden zamalan-guneen diagnostikoa egiten ari da, salgaiak banatzeko behar diren espazio eta denborak hobetze aldera herritarrek egin dituzten eskaerei behar bezala erantzun ahal izateko.

Horretarako, inkesta bati erantzuteko eskatu zaie merkataritza- eta ostalaritza-establezimenduen titularrei. Inkesta horren bidez zuzenean jakin nahi ditugu zamalanen inguruan herrian diren premiak eta ahalik eta informazio gehien bildu behar dugu, konponbiderik egokiena eman ahal izateko.

Egun dauden zamalan-guneak behar bezala kokatuta dauden jakin nahi dugu, beste gunerik behar den horretarako eta, behar izanez gero, zamalan-gune horien jarduera-ordutegia bertako establezimenduen premiei hobeto egokitu beharrik dagoen.

Behin diagnostikoa amaituta, Ermuko Merkatari eta Ostalarien Elkarteari sektorea ordezkatzen duen erakundea delako aurkeztuko dizkiogu emaitzak eta hartu beharreko neurriak adostuko ditugu. Udaltzaingoak bere aldetik, kamioi, furgoneta, eta bi jarlekuko ibilgailu mistoentzat, azterketa teknikoko txartelaren arabera salgaiak garraiatzeko baimena duten ibilgailuentzat erreserbatutako zamalan-guneak errespeta daitezela zainduko du, turismoak kanpoan utzita.

Azken finean, banatze-lanetan aritzen diren profesionalen eguneroko lana kontutan hartu eta erraztu nahi dugu, saltegiek beraien merkataritza-jarduera normaltasunez egin dezaten, eta leku bat izan dezatela ondo aparkatzen denborarik alferrik galdu gabe, edo trafikoko araurik hautsi beharrik gabe, bide publikoaren beste erabiltzaile batzuek zamalanetarako guneak behar dituztenentzat erreserbatutakoak- behar ez bezala erabiltzen dituztelako.