Lehen milia herrikoi eta egokituaren proba deitu du Bidari elkarteak

Ermuan korrituko den lehen milia herrikoi eta egokituaren proba deitu du Bidari elkarteak, Gaztela eta Leoneko Zentro Kulturaleko kirol atalaren eta hainbat babesleren laguntzaz. Proba igandean korrituko da San Pelaio parkearen inguruko kaleetan, goizeko hamarretatik eguerdira bitartean. Hainbat kategoria izanen dira benjaminetatik hasi eta heldu eta adinezkoetara bitartean. Adinaren arabera kategoria bakoitzak irteera ordu ezberdina du, xehetasunak ikus behean uzten dizuegun kartelean. Zirkuituak 537 metroko luzera du, hortaz egokitutako milia korritzen dutenek 1.611 metro beteko dute, hiru buelta eman behar baitituzte. Izen ematea doakoa da eta posta elektroniko bidez egin daiteke, bidarikirolak@yahoo.es eta bidariasociacion@yahoo.es postontzira idatziaz. Eta baita ere irteera eta helmuga puntuan proba hasi baino ordu erdi lehenagora artean. Interesatuek NAN erantsi edo aurkeztu beharko dute, kasuan kasu. Bidarik miliaren estreinako ekimena sustraitu eta datozen urteetan mantentzeko asmoa azaldu du.

Bidari da Ermuko minusbaliatu fisikoak biltzen dituen elkartea. Hori 1994. urtean eratu zen eta harrez geroztik lanean dihardu kideek gizarteratu eta horretan eroso senti daitezen, mugei aurre eginez. Horretarako, informazioa ematen eta lan-munduratzea lortzearen alde ahalegintzen dira. Horrez gain, bazkideei izapideak egiteko laguntza ematen diete, esaterako ibilgailua erosteko minusbaliotasunaren ziurtagiria lortzen, eta abar… Bidari elkartea une honetan oro har pertsonen erabateko garapena lortzeko ahaleginetan buru-belarri segitzen du eta, baita ere, bazkideen artean kirola sustatzeko lanetan.

• Probaren kartela