Ustezko delitu egilea atxilotu eta entregatu dute herriko Udaltzainek

Ustez lapurreta egiteagatik 34 urteko gaztea atxilotu eta Eibarko Ertzain-etxearen esku jarri zuen aurreko astean Ermuko Udaltzaingoak, ohar batean aditzera eman duenez. Oharrean zehazten denez martxoaren 31ko eguerdian Santiago Apostoluaren eliza inguruan gertatutako lapurreta baten berri ematen zuen dei bat jaso zuten. Oharrak azaldu eta zehazten duenez “72 urteko andrazko bati zerbait jateko dirua eskatu omen zion gazte batek. Andreak ezetz erantzun eta bultzakada jaso ostean, gazteak esku poltsa kendu eta korrika alde egin zuen”.

Andreak eta lekukoek agenteei eman zizkieten datu eta deskripzioan oinarriturik, ustezko lapurra lokalizatu eta atxilotu egin zuten beranduxeago. Gazteak ‘Samsung’ markako esku telefonoa zuen, andreak bere jabetzakoa zela adierazi zuena. Eginbideak egiten ari zirenean, partikular batek San Inazio kaleko buzoi batean aurkitutako poltsa entregatu zuen. Andreari bueltatu eta gertakizunaren aurretik zuen diru kopurua falta zitzaiola frogatu zuen.

Okupazio-akta izapidetu ondoren, gaztea Eibarko Ertzain-etxera eraman zuten ertzainek. Udaltzainek andreari lagundu egin zioten Ertzain-etxean salaketa jarri zezan.