Bi gizon atxilotu dituzte goizaldean ustez indarra erabili eta kamioetan erregaia lapurtu izanagatik Okinzurin

Bi gizon atxilotu eta Eibarko Ertzainetxera eramanak izan dira goizaldean, Ermuko Okin Zuri auzoan (Harrobia zegoen zonaldean) ustez indarra erabili eta kamioetan erregaia lapurtu izanaren akusaziopean, Udaltzaingoak ohar baten bidez ezagutzera eman izan duenez. Atxilotutakoek Bermeoko eta Bilboko bizilagunak dira eta epailearen aurrera eraman izateko zain daude. Atxilotuen ibilgailutik hainbat erreminta –maiz delituak egiteko erabiltzen diren bezalakoak- eta objektu antzeman zaizkie, zerrendan horretan ditugularik palanketak, mailuak, kurrikak, bihurkinak, sopleteak, ibilgailu ezberdinen giltza sorta, garaje bateko mandoa, hauts zuridun substantzia izan duen poltsatxoa eta aire konprimituko errebolberra. Gizon biek aurrekari ugari dituzte eta poliziaren hainbat txostenean aipatutakoak dira.

Ermuko Udaltzainen patruilak goizaldeko ordu batak eta hamar minututan gizon bat lokalizatu du kamioi baten kabina eta erremolkearen artean, mangera batez baliatuz garrafa bat betetzen ari zena. Agentek gelditzeko agindua eman eta identifikatu egin dute, Eibarko Ertzainetxera deitu eta gertakizunaren berri emanez, lagundu ziezaieten. Etzainen bigarren patruila bat bertaratu eta Aizko Hormigoiak enpresaren ingurua aztertzen zeudenean, beste kamioi baten atzean ezkutaturik bigarren gizon bat ikusi eta harrapatu dute. Bigarren hau Bilboko bizilaguna izan da eta, ustez lehenago harrapatutakoaren adiskidea.

Bigarren kamioia hormigoi-makina izan da eta honen ondoan zeuden 8 garrafa urdin harrapatu dituzte, bakoitzak 25 litroko edukierakoak. Zortzi ontzietatik bi erregaiez beteta izan dituzte. Kamioiaren erregai depositua irekita aurkitu dute, ustez ondoan eduki duten bihurkin batez bortxatua izan dena. Gizon biei miatu, beren eskubideak zeintzuk diren adierazi eta kotxe ofizialean Eibarko Ertzainetxera eraman dituzte.