Amaitu da adin nagusikoen eta mugikortasun seguruaren inguruko kanpaina

Pasatu den ekainaren 10ean hitzaldi-mintzaldia izan zen Ermuko Pasialeku Nagusi eta Jubilatuen etxean. Segurtasunez mugitzen ikastea eta, horrela, auto istripuak ekiditeko neurriak hartzea zuen xede ekimenak.

Trafikoko Zuzendaritzaren Hezkuntza eta Bide Heziketa Alorreko teknikariek eta Antton Garcia Kirol teknikari eta koordinatzailea aritu ziren hizlari, eta 50 pertsona inguru gerturatu ziren haien hitzak entzutera. Auto-harrapaketak izan ziren gai nagusia; izan ere, adinean aurrera egin ahala, harrapaketa larriak ohikoagoak dira.

64 urtetik aurrerako eta dependentziarik gabeko pertsonentzat pentsatutako kanpaina baten barnean kokatu da sesioa, eta interes eta jakin-min handia piztu zuen parte-hartzaileen artean. Hori dela eta, balorazioa oso positiboa da.

Ermuko Udaltzaingoak garatu du ekimena, eta adineko pertsonekin hobeto elkar ulertzeko eta haien arazoak, zalantzak eta ardurak ezagutzeko baliagarria izan dela adierazi du. Bestalde, egunerokotasunean, partekatutako erantzukizunaren ideia argi utzi nahi izan dute agenteek, bideetako erabiltzaile guztientzat segurtasuna bermatu eta istripuak ekiditeko.