Mugikortasunaren Astea, azken txanpan

Irailaren 16an hasi zen Europako Mugikortasunaren Astea, eta Ermuko herritarrak gogotsu parte hartzen ari dira. Aste osoan zehar, eta hilaren 22ra arte, era askotako ekintzak antolatu dira, esaterako, larunbat goizean Orbe Kardinalaren plazan izandako bizikleta tailerrak.

Orbea enpresaren eta Agirre Kirolaken laguntzarekin, zirkuitu bat prestatu zuten plazan konoekin, seinaleekin eta geziekin. Trebetasun eta abilezia zirkuituan, haur eta gazte ugarik hartu zuten parte, bi gurpilen gainean iaioak direla erakutsiz. Tamaina eta kolore ezberdinetako bizikletak izan zituzten prest, edonork parte hartu ahal izateko. Amaieran, gainera, saria jaso zuten kolaboratzaileen eskutik: bidoia, txirrina, eskumuturreko islatzailea eta diskoa.

Albistearen amaieran ekimeneko hainbat argazki ikus ditzakezue.

Amaiera borobiltzeko, erakusketak

Pasatu den astean asteazkenetik ostiralera egin zen moduan, hilaren 22ra arte Oinez Eskolara programarekin jarraituko da, eta guraso nahiz seme-alabak Eskolabarrira oinez joango dira. Bestalde, Stop Accidentes Euskadiren "Oinezko, etzazu zure bizitza gurutzatu" erakusketa ere zabalik izango da bihar arte Udal Liburutegiko hallean, 09:30etik 20:30era.

Aste berezi honetako egutegia ixteko, lehen hezkuntzako hirugarren mailako ikasleek egindako marrazki eta eskulanak ikusteko aukera izango da bihar. Lan guztiak bide segurtasunarekin lotura izango dute, eta Valdespinako Markesa kalean izango dira ikusgai 17:00etatik 19:00etara. Eguraldi txarra eginez gero, Merkatuan jarriko da erakusketa.