Aldapako eskailera, hiru hilabetez itxita

Hiru igogailu publikoak eraikitzeko lanek aurrera jarraitzen dute, hasi zirenetik ia hilabete igaro den honetan. Construcciones Olabarri enpresa aldi berean ari da lanean San Pelaion, Aldapan eta Zerukoan, eta herritarrei eragin diezaieketen hainbat aldaketa egiten ari dira aipatutako tokietan.

Egun hauetako aldaketa nagusia datorren hiru hilabeteetarako Aldapako eskailera ixtea da. Gainera, atzeko kalera, 6 eta 8 zenbakietara igarotzeko kalea hartuta dago eta behin-behineko arrapala muntatzen hasi dira. Hori horrela, aipatutako etxebizitzetara igotzeko arrapala datozen egunetan eraitsiko dute.

San Pelaiori dagokionez, Aldapara igotzeko behin-behineko eskailera kokatuko da aste honetan. Bertan jada zuloa egin dute karrilak kokatzeko, eta astelehenetik aurrera zubi-brankak behar dituen zulaketak egiten hasiko dira.

Zerukoa kaleko lanetan, ezin ahaztu eskoletara iristen den bidea itxita egongo dela obrak amaitu arte. Gainera, eskailera mekanikoen irteeran hesiak jarri dira, eta bide berezi bat prestatu da oinezkoak kaletik normaltasunez igarotzeko. Gainontzean, datorren asterako jada egin den zuloan zimendatzeak eta hormak eraikitzeko lanak egingo direla aurreikusi da.

Hiru igogailu publikoen lanak 2016ko maiatzerako amaituko direla espero da.