'Kreditua' antzezlana, Zuhaitz Gurrutxaga eta Joseba Apaolaza aktoreen eskutik

Sukurtsaletako zuzendariek ondotxo dakite gauzak zenbateraino korapilatu daitezkeen. Orain arte, dirua behar zuenak bankura jotzen zuen kreditua eskatzera, eta ematen ez ziotenean, isildu eta etxera burumakur itzultzen zen. Gaur egun, baina, ezin zara fidatu; kreditua ukatzen zaiona ez da, beharbada, apal-apal etxera itzuliko.

Egoera hori da Tanttaka Teatroaren ‘Kreditua’ antzezlanaren abiapuntua. Jordi Galceran dramaturgo kataluniarraren obran oinarritutako ikuskizuna Fernando Bernuesek zuzendu du, eta Zuhaitz Gurrutxaga eta Joseba Apaolaza aktore ezagunak ditu protagonista. Ostiral honetan bertan Ermua Antzokian izango dugu tragikomedia hori ikusteko aukera.

Antzezlana euskara hutsean izango da, eta 90 minutu inguruko iraupena du.

Ikuskizuna ostiralean, 22:15ean hasiko da, eta sarrerak 10 eurotan daude salgai Lobiano Kultur Gunean, BBKren orotariko kutxazainetan, Kutxabanken webgunean edota, antzezlana hasi baino ordubete lehenagotik, Ermua Antzokiko leihatilan.