Lolita Floresek Ermua Antzokia beteko du ‘La plaza del Diamante’ antzezlanarekin

Gerraondoko Bartzelonako istorio gordinak Ermua Antzokira iritsiko dira ostiralean ‘La plaza del Diamante’ antzezlanaren eskutik. Lolita Flores aktore eta abeslari ezagunak barneko bakarrizketa gogor bat antzeztuko du leporaino beteko den aretoan; izan ere, ia sarrera guztiak saldu dira jada.

Natalia ‘La Colometa’ neskatilaren istorioa kontatzen du obrak. Munduan galduta sentitzen da Natalia; amarik gabe, ingurukoak joaten eta hiltzen ikusiko ditu, gosea eta miseria pasatuko ditu eta bere seme-alabekin aurrera egiteko gaitasunik gabe sentituko da sarritan. Gerraosteko narratiba kataluniarreko lanik garrantzitsuenetako bat da. Garai hartako Bartzelonako kronika zehatza eskaintzen du, eta aro horrek bertako biztanleengan zer-nolako eragina izan zuen erakusten du.

Bakarrizketa zirraragarri hau ostiralean izango da ikusgai 22:15etik aurrera, eta 75 minutu inguruko iraupena dauka. Sarrerek 15 euro balio dute, eta Lobiano Kultur Gunean, BBKren orotariko kutxazainetan edota Kutxabanken webgunean eskuratu daitezke. Agortzear daudenez, ezin da bermatu ostiralean bertan Antzokiko leihatilan salgai izango ote diren.

Antzezlanaren aurrerapen bat ikusi dezakezue ondoko bideoan: