Aldapa Iparraldeko exekuzio-unitatearen xehetasun azterketa onartu da

Ermuko udalbatzak ohiko bilkuran onartu du Aldapa Iparraldeko 09-1 exekuzio-unitatearen xehetasun azterketaren aldaketa. Ekimenak aldeko 11 boto eta lau abstentziorekin egin du aurrera.

Aurrez informazio batzorde ezberdinetan jorratu izan den gaia da. Azken finean, proposatzen dena Aldapa Iparraldeko zonaldean babestutako 45 etxebizitza eraikitzea da. Xehetasun azterketa Galivivienda XXI kooperatiba elkarteak aurkeztu du, eta horren memoria hemen ikus daiteke.

Azterketa ez da gehiegi aldatu azkenengoz aurkeztu zen bertsiotik; aldaketa txiki bat dago bolumetrian, besterik ez. Horren ondorioz, eraikinen altuera eta mailakatzea areagotuko dira, baina gainontzeko parametroei ez die eragingo.

Hasierako onespen-espedientea azaroaren 17an argitaratu zen Bizkaiko Aldizkari Ofizialean, eta hiru egun beranduago, El Correo egunkariaren Gipuzkoa edizioan. Hogei eguneko epean ez denez alegaziorik aurkeztu, asteazken honetan behin betiko onartu da.

Aurreikuspenen arabera, 45 etxebizitza eraikiko dira Aldapa Iparraldeko 8.842 metro karratuko terrenoan, eta prezio tasatua izango dute. Juan Carlos Abascal Hirigintza zinegotziak otsailaren 3ko osoko bilkuran azaldu duenez, ekintza horren helburuetako bat Ermuan etxebizitza babestuak izatea da, merkatuan sartzeko zailtasunak dituzten pertsonek aurrera egin dezaten (esaterako, independizatu nahi duten gazteak, adineko pertsonak…).

Bestalde, proiektu honekin baztertutako espazioak berreskuratu nahi dira, erabilera ezberdinak emateko –etxebizitza, garajeak, hirigunea birmoldatzeko…– eta hiritarrek etxebizitza librea edo babestua eskuratzeko aukera izan dezaten.

Proposamenak PSE-EE/PSOE (5), EAJ (3), Se puede Ermua ahal da (2) eta PP (1) alderdien aldeko botoak jaso ditu; EH Bildu (3) eta Irabazi (1), aldiz, abstenitu egin dira.

Gai horri buruzko informazio guztia saio honetako ‘dokumentazio osagarria’ atalean topa dezakezue, hirugarren puntuan.