Zerukoako igogailuaren egitura, prest

Duela astebete San Pelaioko obretan egin zen moduan, Zerukoa eta Ongarai auzoak lotuko dituen igogailuaren egitura eta pasagunea bere tokian daude jada. Atzo, osteguna, Gasteiztik ekarri zen muntaiarako beharrezko materiala, eta kabina igaroko den egitura eta oinezkoak ibiltzeko pasabidea instalatuta daude dagokien lekuan.

Bi pieza horiek San Pelaioko obretan kokatu direnak baino txikiagoak dira. Armazoiak 10,11 metroko altuera du, aipatutako lanetakoak baino hiru metro gutxiago; oinezkoentzat pasabideak, aldiz, 8,21 metroko luzera du, askoz laburragoa, beste pasabidearen 22 metroen aldean.

Construcciones Olabarri esleipendun enpresako langileek egin dute instalazioa, Gruas Katillu enpresarekin elkarlanean. Lanak aurreikusitako martxan doaz aurrera.

• Zerukoa auzoko igogailuaren planoak

Datozen asteetan Aldapa eta Ongarai lotuko dituen zatiari dagozkion egitura eta materiala jasoko da. Eman beharreko pausoak berdin-berdinak izango dira: lehenik zati bertikala kokatuko da, eta jarraian, pasabideak.

Segidan ikus ditzakezue Zerukoako obren egungo egoera erakusten duten argazkiak, igogailuaren egitura nagusia kokatu ostean.